بسم الله الرحمن الرحيم



مرثية للشاعر / عايد ضافي الجلوي رحمه الله بالمرحوم غصاب بن عيادة أبا الرجلين :



علماً لفـى ماسـر قلبي ولاطـاب *** ليته رجـع منا على رأس راعيه



ياشين ياللـي جبتلي علـم غصاب *** ماجبت علم يفرح القلب طاريه



فـاجأتني بأغلى صديق بالأصحاب *** ماأخفيت علمه يوم كثرت نواعيه



لاطارش نرجي يجـي عقب ماغاب *** ولاهـو مريض نرجي الله يشافيه



جـابوه لبيتن من دخل فيه مايجاب *** بيـت بغيض وكـلنا مـاندانـيه



ياحيف ليت البيت ماهـو لغصـاب *** لـيته سكن به واحد غير راعـيه



المـوت يجـري والمنايا بالأسباب *** ولابد ماتجـري عليـنا جـواريه



حطوه وأقفو يـوم فاتو مـع الباب *** مدري شمال الحـوش ولا بغربيه



والله لو أدري وين هو قبر غصاب *** حلفت لو ماهو على الدرب لاجيه



ليا أعترض طاري الغوالي والأحباب *** والله لأردد اسم غصاب واطريه



لـو كان ميت له مشـاريه وعتاب *** على الصديق الى يعـزه ويغليه



ياليتهـم بنو علـى قـبر غصـاب *** بـنيتً عـن الهبـايب تـذريـه



وياليتهم حطـوه في رأس مرقـاب *** حتى نـمره يـوم ننزل حواليـه



يالله تجعل لـه عـن النار مجنـاب *** تسمح خطاياه القـديمه وتعفيـه



بجنة الفـردوس يدخل بـلا حساب *** عـن العذاب بجنة الخلد ترضيه