.

أقسم برب السما و الارض والكعبــه الشريفــه
اللي فباكر يحاسبني وانا صاغر وحافــي

ان كل حمـــول ها لدنيا على متني خفيفــــــــــه
دام لي قلب نظيفن وروح ذيب وعقل صافي

دامني نسل الحرار هناك بالروس المنيــفــــــه
الطنايا بشتي اللي من عروق المجد ضافي

من حميا ..من عزاوي..من هل سيوفن رهيفه
ما يعاندهم بخـيـتن ألا ابو ملعون هــافــي

الطــنايــا نشّد العز المعتّق عــن مضــــــــيفه
وعــدّو ..كم من شمري في مضيف المجد لافي

يكفي لا قلت اني من روس الزحازيح المخيفه
شمري وان قلت شمّر..والله هذا الاسم كافي

بلّغوا بنت الحصان اللي مجاذبها نظــــــيـــفه
كانها تبغــى المفـارق لاجل ماعندي …عوافي

البحر يعطي البعيـــد..شحال من وقّف بسيفه
النهر يروي العطاشــا..شلون لاصارت ضفــافي

بلغوها اللي قست…من عقب ما كانت لطيفه
تنتــظـر ..بس تسمع الكلمه الاخيره من شفافي

ما تقيمني ظــروف..وقوة الفارس بسيــــفه
وان قدر واقع يحجّمــني اكون انســان طـــافي

ادري باعتني ولكن …سالمن راعي النصيفه
حصــتي من البيع جثمانك يا قلبن مات وافـــي

الغلط مو فيك يا قلبن فنا لعيـون ضــيفــــه
الغلط باللي رخص بك…عذره ان الحظ غــافي

صبر وتصير الجروح…الذابحه فيني طفيفه
وقت وتصير الهموم….الكامنه فيني قــوافــي

أصلا يجيك الربيع أنظر..اذا كفّن خريـــفه
أصلا تجيك النفوس أقوى….اذا ذاقت تجافـــي

لا تخاف البعد حتى…حتى لو اوجست خيفه
تسكن الغربه بوسط الروح….ماهي بالمنافـي

علمتني الدنيــا …لاقفّت مره….خلّه بكيفه
والزعل..لا تزعل..ألا لا اندفن…حرّ سنـــــافي