[poem=font="simplified arabic,6,black,bold,normal" bkcolor="transparent" bkimage="backgrounds/27.gif" border="outset,6,firebrick" type=1 line=1 align=center use=ex num="0,black""]
دك هاجوسٍ بفكري والمثل نختاره = ماقفٍ فيه أتفكر جازلي تصويره
بالبيوت نصور المعنى على مقداره = والخبر بين الضلوع محجبٍ تعبيره
شلت عفشي فوق سلوى ناويٍ مسفاره = وأشتكت ضيم الفراش ولا تشيل لغيره
ناويٍ يم الربيع وخوةٍ مختاره = بروضةٍ ينفح عبير الورد يلعب طيره
بين ربعٍ عندهم قدري علا مقداره = والوناسه فرصةٍ ما نوفره توفيره
يا جلسوا في خايعٍ قامت تفوح أزهاره=وقلطوا كل المعاني والكريم يديره
والحطب جابوه سمرٍ وأشعلوبه ناره = وحطوا الفرشه ومركا للكبْر تقديره
والطلي مذبوح ومعلق على شنكاره = والشوايا فوق جمرٍ باديٍ تحميره
والعويدي والمهيل بس فوح بهاره = يقعد العمسان شمة فوحت التبهيره
في دلالٍ دقت البغداد لها شاره = والبريق مخدرٍ شاهيه والتشجيره
وساقه اللي عمه وخاله ذكر بأذكاره = للكبير أول بداه ولنشاما يديره
والمهوجس ساح باله وإنتحن أفكاره = الوناسه ضيعة عن هاجسه تفكيره
كلٍ أفلح بالعلوم الغانمه وأخباره = والشعر جاله مجاله في حسين السيره
مجلسٍ فيه العلوم الطيبه وأذكاره = وباب هرجٍ بالنقيلي قفلوا تسكيره
ولا بقا كود الأماني والأمل مشواره = جيب لاندكروز تو ببديه التغبيره
أشهبٍ ماينْفرق لونه بلون غباره = ورده عبداللطيف ولا أشتهر في غيره
كنه الحر الموكر فوق عال أوكاره = رافعٍ مقدام خشمه ما طمن تحديره
يا مشى مع جرهدٍ يطوي بعيد دياره=يعجبك يا نشت بنصه زمرة الصفيره
ايتحداء كنه اللي شاربٍ زقاره = وكنه الباتع ليا شاف الخصيم يديره
لا يهمه لاسنود ولا بعد محداره = وعن مجال السيل والله أبدعوا تطويره
حطوا الهزاز عن درب الزلق وأخطاره = يعجبك بالسيل وإلا بالرمل تدويره
فزته فزة شجيعٍ متهمينٍ جاره = ومن وفاه وقو باسه صايبته الغيره
وفي كبوته رمز لإسمه كالزمام شعاره = وعن عواثير الطريق مدبلين سبيره
وفي ظلام الليل صبح ليا شعلن أنواره = شمس صبحٍ مشرقٍ في موطنه تنويره
والرفارف كالهلال محددٍ مقداره = لنزول ولطلوع محددٍ تقديره
وياصفحت لجنب شيخٍ لابسٍ لخياره = بشت من نوع الحساوي صنعه وتصديره
كن خطه زري بشت مزودٍ بعياره = صنع منهو متقنٍ لصناعته خبيره
ويا نطحته كنه اللي يبشرك ببشاره = ملمحه يعطيك رمز مقربات الديره
ويا قفيته ردف غنج الحور وإلا ساره = شايلٍ كل الوصايف بالحلا ماغيره
يا أشتغل كنه يناجي واحدٍ بأسراره = ما سمعت إلا مناجات البلوف لسيره
صنعة اللي يوم درْسه فاز من شطاره = نايلٍ كل الجوايز يعتمد تقديره
صنع ياباني محدد لوكلاه أسعاره = وبإختراعه حط له عن سرقته تشفيره
أسهمه فوق العلالي مرتفع مقداره = ما طمن بالبورصه فاتورة التسعيره
تسعه فوق الفين تو مربطٍ مسماره = هو منايه وقت حزات المنا ما غيره
هذا شَفِّي كان سيل الأرض طم القاره = والخفي عند الولي معلومه وتدبيره[/poem]