من يوم غبتي والتعَب يكتب ْ عَلى وجهى أرق ..!!
من يوم غبتي والسهَر ما كفـّـر الذنب وغفى ..!!



مدري بموت من العطش والا بموت من الغرق
من روحتك وآنا انتظر .. واعشــّم جروحي شفا



مامرّ في صدري عذر الاّ رميـته واحتـرق
حتى استحيت من الضلوع ليا نشدتني .. (مالفى )؟!



طفل الفَرح يالجافيه..كل ما ارتشف زولك شرَق
بالواقـع اللي مانسكب في داخل عروقي وفا..



يا مِزنْ ..يا فَزعَة بدو .. يا نسمَة الصبْح وأرق
يا ميبّسَـة غصن الهوى .. يا ضد .. يا قسوة جفا..!



ياللي حَرمتي خطوتي لا تكتب بقاع الورق
يا ملبـّسَة برد الشّعْر من هيبـتك ثوب الدفا..



يا اوضح براءة مُتـهـم ما لامس الذنب وسرَق
يا سالبتني بالخفا .. ماعاد بَه شي ٍ خفا..



مايذّبَح العاشق سوى دمع ٍ يداريه و زرَق
في مجلس عيون البشر والشوف ما صدّ وعفى ..!!



اذكر زمان كفوفنا تصبّبت عشق وعرَق
واقول وقتك ماصفا .. قلتي ولا عمرَه صفا..



وآقول ما دامك معي والله لاكون المفترق
ما بين أكبَر اُمنية وجراح وقت ٍ ما اكتفى..



ومن عقْب مآخذتي ثمَر غصني وخليتي ورَق
عرفت وش معنى يمرّ العيد شخص ٍ ما احتفى..



يمكننا نطري بعَض لكنّ بَه شي ٍ فرَق
إني إذا جيت اذكرك .. صاحت ضلوعي يا سفا ..!!