[poem=font="simplified arabic,6,white,normal,normal" bkcolor="transparent" bkimage="backgrounds/9.gif" border="none,4,gray" type=1 line=0 align=center use=ex num="0,black"]
يا ريوف ياعلّك بحالي تروفيـن=لاقلّ شوفي وانحنت بي عصايـه

يمين من نزّل تبـارك وياسيـن=انك قمر عمري وكوكب فضايـه

أدراك بالخاطر واعاملك بالليـن=وارجي عسى الله مايخيّب رجايه

احب من حبك واعادي المعادين=وادعي لك الله بالستر والهدايـه

فقدتك البارح وجريت صوتيـن=هذي وهي ليله وعنـد انسبايـه

كله غلا ياويلي اثر الغلا شيـن=الله واسالـه لايبـيّـن غـلايـه

من حبها حبيت كل الصغيريـن=صارت محبتهـم بقلبـي هوايـه

عودتك الممشى على شان تمشين=اشد بالثنتيـن واقصـر خطايـه

وليا بكيتي قمت اهلل وتصغيـن=واحيان اغني لـك واردد غنايـه

يضيق صدري لاسمعتك تونيـن=واجر صوتي من خلاي بخلايـه

وان جيت ابقفي عنك لدّيت بالعين=الدرب قدامـي واطالـع ورايـه

رد الوفا ياريوف ماابيه ذالحيـن=ابيه لـي دارت عليـه رحايـه

ابيه لا منه غـدا الليـل ليليـن=لا اشتدّت الايام واظلـم سمايـه

وابيه لامن صارت العشر ثنتيـن=اليا اتركوني عزوتـي واقربايـه

وابيه لا عزّوك فـيّ المعزيـن=تدعين رب البيت يغفر خطايـه

اليا كتب ربي افـراق المحبيـن=ثم ادفنونـي لابتـي واصدقايـه

توك صغيرة سنّ مانتيب تدريـن=والعالم الله وش تكـون النهايـه

اما التفتي لي وزين علـى زيـن=والا رميتينـي بـدار الرعايـه
[/poem]