[align=center]
واحد من الاصدقاء اسمه حمود ومعه كابريس وحصل انه جاه صاحب جيب لاند كروزر واراد ان يشتري الكابرس من حمود ويبيع الجيب على حمود ورفض حمودوكلمني وقال وش رايك بالجيب الجيب جديد
والكابرس ايضا جديده وقلت بيع الكابريس واشتر الجيب ورفض حمود وقلت هذه القصيده وعند ماسمعها باع الكابرس واشترا جيب غير الجيب الاول
وايليكم هذه القصيده لعلها تحوز على رضاءكم [/align]


[poem=font="simplified arabic,6,green,normal,normal" bkcolor="transparent" bkimage="" border="double,7,darkred" type=0 line=0 align=center use=ex num="0,black"]

ياحمود بيع الكابرس واشتر الجيـب = تـراه بالطرقـه خويـن سنـافـي

ان صار في صدرك هموم ولواهيب = نارن ماتطفيهـا رجـال المطافـي

دقيت سلفه لاعوى الذيـب للذيـب = والتانكـي مليـان هـو والاضافـي

بانزين احمـر مثـل دم التلابيـب = مصفى باعلـى تقنيـات المصافـي

ومعك اثنين مـن كـرام الاشانيـب = ماهم بمن اهل النفـوس الضعافـي

من سلالة اللي ينطحون المواجيـب = ريـف الضعافـا باليـال العجافـي

ومرتبين العفش بالحـوض ترتيـب = ومكتفيـن الكبـش معكـم كتـافـي

وعبيتو الما بالجراكن مـن الشيـب = وتواعدو اهـل الجيـوب الخفافـي

اللي يقرب نـازح البعـد تقريـب = ياسـرع مايطـوي بعيـد الفيافـي

صقراًمحول من علـو الضباضيـب = ولمح بعينه شي واشـرف وشافـي

وشاف الحباري مقفياتـن مساريـب = واطلب علـى ساقـت طيورٍمقافـي

يردهن غصبـن عليهـن بلاطيـب = حتـى يعافـن السلامـه عيـافـي

اليا تناوشهـن بـروس المخاليـب = مثل احدعش سبتمبر اللـي يشافـي

عقب المطريبغون روس المراقيـب = في ديرةٍ فيهـا الحجـل والعرافـي

والصيد فيهـا محتمـي بالشخانيـب = اللي من الريحـه يصيبـه شعافـي

والأرض خضر جبالها والاداعيـب = والجو غايـم مامعـه لفـح سافـي

ريح الخزاما فايحـن كنـه الطيـب = مسكٍ بجذلـة مـن يحـط الشنافـي

وشبيت نارك والخشايب مشاهيـب = وسويت فنجالٍ على الكيـف وافـي

بصفر الدلال المكرمات المحاديـب = الوافيـات الكايـفـات النضـافـي

لاقيموه اهـل المـزاج الشواريـب = قالو هـذا الفنجـال وافـي وكافـي

ان شفه الخرمان جتـه التعاجيـب = طش الشماغ وزان بـدع القوافـي

ثم استوى الطاروق بيـن الواعيـب = والجو من بين الشواعيـر صافـي

شعـار تفتـح مبهمـات الدواليـب = كالمسـردي والاكلبـي والنصافـي

في صفح ضلعن به رسوم ومكاتيب = وخيلـن عليهـن ناقليـن الشلافـي

رسومات يمكن في عهد نوح وشعيب = قبـل ميـات اسنيـن والا الافــي

لولا قروش الجيب مابـه عذاريـب = غلب على كـل المواتـر وطافـي

والكابرس ماسبها والنفض الجيـب = سيـارةٍ زينـه بوقـت العـوافـي

اتودي الراكب مع القـار وتجيـب = وان جيت توقف لاتعـدى الكتافـي

ان غرزت ماتطلـع الا بسواحيـب = واقعـد اليامنـه يجيـك السعافـي

والشارع اليا سيله غسلـت السيـب = القاك بالشـارع وموتـرك طافـي [/poem]