السلام عليكم ورحمة الله وبركاته

لا غاب صوتك لا تغيب الرسايل
مليت صبري والصبر مـل منـي

حاول تواصلني بشتـى الوسايـل
ابيك يا عمري تجي عنـد ظنـي

بعدك بلا ميعـاد سـوى هوايـل
شاب الشعر بالرغم من صغر سني

الشوق والهوجاس صايل وجايـل
هـذا يصبرنـي وهـذا يغـنـي

هاجس على جده وهاجس بحايـل
هواجس ٍ جارن علـي واسهرنـي

صدقت انا قصة نجـوم القوايـل
حتى عيوني صدقـن و خدعنـي

لك في خفا روحي جيوش وقبايل
و رمح ٍ بعينك في خفوقي مكنـي

ولك شفة ٍ تذبح اعيـال الحمايـل
لو شافها قـرم ٍ قعـد وارجهنـي

وتكشف ورا الشفه بروق المخايل
من شافها يفرح ولو هـو يونـي

ولك وقفة ٍ تشبه شموخ الاصايـل
وش عاد لو هن بالوغى يسرجني

ولك جلسة اللي للنواميـس طايـل
عقيد قـوم ٍ لا نـوى مـا يثنـي

ولك مشية ٍ تعمل بقلبـي عمايـل
فيها الخجل فيها العجـل والتأنـي

انا على فرقـاك مامـن صمايـل
الشـوق والتحنـان مـا يتركنـي

ان كان منت بمتصـل بالموبايـل
عادي .. مدام ان الرسايل يجنـي

رسايلك اجر و ثـواب و جمايـل
في حال قلب ٍ من بعـادك يحنـي

ارفق بقلب ٍ من عنا الوقت نايـل
لا تسمح لغـارات وقتـي تشنـي