[poem=font="Simplified Arabic,5,white,normal,normal" bkcolor="transparent" bkimage="backgrounds/3.gif" border="double,6,seagreen" type=1 line=0 align=center use=ex num="0,black"]

الطيب خصله تحتويها رجاجيـل=ولاكل رجلن لابغى الطيب جابه
الطيب ضلعه للنشامـا مداهيـل=ضلعاً طويل ويتعب اللي رقابـه
دربه صعيب ولا يجي بالتساهيل=مايسلكه ياكـود رجلـن مشابـه
ليثً ليا منه حضر يدبـل الكيـل=نابه شطير ويكسر الصلب نابـه
لا ثقلت حمول الزمن شالها شيل=وان شال حملً مايحّسب حسابـه
حلال حلحيلن يحـل الحلاحيـل=رجلن على الشدات كلـن يهابـه
سلام للي بالوفا يسـرج الخيـل=قرمً على الطولات يتعب أركابه
ضرغام لامن انتخى يكرب الحيل=قوّي عزم وفي شموخـه مهآبـه
دروب الخطر يدوسها بعتمة الليل=ومن هيبته لابـان تجفـل ذيابـه
( منصور ) ياللي ذاخره للمقابيل=فعل الكرم والمرجله هي زهابـه
كفه ندي بالطيب ويسّيل السيـل=ووقت الطرد يزداد باسه صلابه
يمناه ببذل الجود مثـل الهماليـل=ديم المزون اللي نشت من سحابه
براقها بالليـل ضـيء القناديـل=يشق ستر الليل ويكشـف نقابـه
من عادته مايتبع القـال والقيـل=ولامن تكلم فـي كلامـه ذرابـه
يحب قول الصدق ومايقبل الميل=واصعب سؤالً مايعّسره جوابـه
للطيب رجْال .. وللرديه رجاجيل=وكلن حسب فعله يفصّـل ثيابـه
[/poem]

[align=center]الشاعر/ محمد هايش الرويلي[/align]