الشعر أبوي.. ولا بعد قلت: لبيه
إلا ل(بحّة وزنه (و(صوت قافه)
ماقبلي أحد قد تربّى على يديه
ولاغيري أحد سمع صوته وشافه
أغليه.. وأخافه.. وأحبّه.. وأداريه
واخاف لا افقد دهشتي فاكتشافه
على كثر ما أبيه وأتعب وأنا أبيه
ماقد شكيت لغيمته من جفافه
إن ألتفت في حالي.. الله يحييّه
وأِن ما ألتفت.. ما ألحقت عمري حسافه
ياما على غفله غرقت فشواطيه
وياما رمى في قاع صوتي ضفافه
وأمسيت أغني له.. وأشيله.. وأشاكيه
كنّي مكوّم كل ماكان طافه!
أحاول أقوى شي مانيب قاويه
وأحاول أقبل شي نفسي تعافه
اسمع من هروج العتب والمسافيه
.. مازوّد حمول التعب والمسافه
ناسٍ بلوني بالحسد والمشاريه
مافيهم اللي وسط قلبه مخافه..
لا.. والمصيبه.. ويش أنا منحسد فيه ؟
في الشعر، ودروب السهر، والكلافه !
قولوا لذاك اللي (سهادي) على ايديه
وش جاه مني ؟! لعنبوها ضعافه
ان كان حاسدني على الشعر والتيه
يجي يبادلني.. وأخط اعترافه:
يعطيني راحة باله اللي تقدّيه
وأيامه اللي ماتعرف الصلافه
ونذر علي لأعطيه.. وأعطيه.. وأعطيه
حتى يملّ من الشعر والصحافه
الشاعر:فهدالمسااعد.


هذه القصيده جديده وارجو ان تنال اعجابكم


تقبلو مني فائق الاحترام