((ديوان الشاعر:مـعـيـض بن عـريـفـج))

زلـة الطيب علي اتجاهلها
كان جت مقصوده اوغيرمقصوده
اتلمس له معاذير واقبلها
حتى لوكبدي من الغيض ملهوده
فدوة اللي عقدة الراي يفتلها
دائماً كفه على الطيب ممدوده
راعي ابشر سم لبيه وازهلها
حاجتك لاجيت له قال موجوده
زلته لاجاتني. عندي اقتلها
بجيش صبراً ندحر ابليس بجنوده
ثم اكفنها وابيحه. واحللها
ثـم اوديـها مـثلـث بـرامـوده
زلــته فـي طـيـباتـه نــبــدلـها
ونرفع البيضا على اشعار والسوده
وكان جت من شين مبدا وطولها
واحدن معه الاحاسيس مفقوده
الـرزالـه مـن مخـابيه يـنسـلها
وارثٍ علم الرزاله من جدوده
معرفته اشطب عليها وكنسلها
اخصره واعطه خروجٍ بلاعوده
صد. عنه وشيمتك لاتهملها
ولاتعرضها هل النقص والزوده
والصدور الضيقه لاتجادلها
تطلع في لك قصةٍ غير محموده
نوب تسمع كلمةٍ ماتحملها
بساعتن قشرا والاعصاب مشدوده
قيد رجول الحماقه. وكبلها
ثم ميز صادر العلم. ووروده
افهم عقول البشر من تعاملها
اعط كلٍ قد عقله على موده
والله ارزاق المخاليق كافلها
والعمر وقت ولياليه معدوده
منت فاضي للمهابيل وعللها
وكلٍ افعاله لشرواه مردوده
طبوع خلق الله ماتقدر تبدلها
لوبذل مخترع الافكار مجهوده

معيض بن عريفج