سبب هذا الخنوع الجبن

[poem=font="simplified arabic,5,blue,normal,normal" bkcolor="transparent" bkimage="" border="none,1,gray" type=3 line=0 align=center use=ex num="0,black"]
تمقطرت القلوب اللي ورى كتمانها آل سوار = لقيت ان القلوب جيوب مسفيه وممطوره
توارى دربها والبير مردومه صخر وغبار= تساوت به مساحات رفاعه يشبه لغوره
الاوين انت ياللي تحتوي ترسانة الاسرار=عميلك مطمئن البال في سِرّه ومطموره
ينام الليل ياباح الكنين لآخر المشوار=ولاينغص عليه الهاجس اللي يجرح شعوره
ألا وين الصديق الصادق اللي بالوفا مغوار=يشوش ويعتلي هام الصداقه فعله وشوره
تشوح الشايحه تربك ترانيم وتعل اوتار=يغيب السمع في وسط الزحام وتغترب صوره
تناهى ياتباهى في سماها الكاشف الغمار =تصونع ضحكةٍ صفرا وتشكي للزمن جوره
تحورق غِب سكان الزمن والدار والديّار=وتنعى دار سكانٍ مضى من وقتهم دوره
عليهم رحمة الباري سلاله واْصْلَها مابار=عسى ينمي( بقايا النبت وعروقه)من جذوره
وترجع فكرة صدور الرجال مصندقه باْصْرار=وهذي تكفي الوقت العجيب وتاقف بزوره
وياكم تكتنفني حيرتي غير اجتياح (الزار)=ليامِنْ زارني باْسرار خلق الله (بعض زوره)
يتيه العقل في غيم الهزل وتسافر الافكار=تجيه (السومه) اللي تستبيح العاقل وطوره
تملعن تنلعن تستغفر وتستعذب الاذكار=تطوش لياستعاذت بالولي من لعنة الفورة
وياما ماشقاني يابلد ماثرثر الهذّار=على ماقيل من (سقط المتاع)ولابه مروره
بعد من منطلق حُرْمَةْ دلالٍ يصطفقها احرار=يغيض الغيض عن درب السفيه ونبش مستوره
تفرعن (طَبْع) غلّاب (التطبُع)والطبوع اطوار=زمى (شيمه) سهج(زيف السقيم) وجمهرة زوره
(دوام الحال)من سابع محال تكمّل المشوار=قبل صدام فاروق الملك دارت به الدوره
بعد (من شق جيب الناس)شَقّوله جيوب الثار=ومن (بيته قزاز) لياتمادى بان مكسوره
تدندن يالحن وانسى /توجه وجهة التيار=تراقص للطرب (عِلْ العرب)مافاد دكتوره
مثل من قلّد الممشى وضيّع ضَبْطَةَ المعيار=وضيّع مشيه الاول ولا جت له على شوره
وكن الدّور والدّاره تدور بغيبةْ المقدار=تمادت قصة (التطبيع) باخفاقات مشكوره
الا (يامعايد الحَيّيّن )تذكّر ماحصل وش صار=لانت اللي جنيت الفود /ولالحّقْت مظهوره
توكلنا على الرب الكريم القادر الستار=على لحونٍ تمادت بالكلام وغامق سطوره
تروق النوق مع كبر الفتوق وتاكل الصبّار=وَيَاصُبْرَكْ ( يابو صابر )على ظيمك مع شروره
تِعِبْ متن الورق شرقٍ توسط صفحة التكرار=عِشِق لدْغ الجحر مرّات ياما ملّت جحوره
بقا له مابقا له غير مجد بسالف الاذكار=مثل من قال (كان الوالد )/وشخصه طفى نوره
وصار المنكر المعروف/ والمعروف عكس الكار=تطاولنا المباني والمكان وعالي قصوره
تباعدنا المسافه والبخيت مجمّع الدينار=نشيل شوال مال وحال /عيشتنا بها خطوره
تعالوا يرحم الموتى ومروا مرّت الزوّار=ترى صدور العرب بالذات مبليه ومقهوره
ترى التاريخ له بارود ماتفرق كبير كبار=عن اتفه ماصغر حجمه ولا تنشد عن العوره
ابا انشد مهتوين اللغز وش شي(ن) ليامن طار = يصير الآدمي (ناطق) وحاله غير ميسوره
واذا قربتها بالحيل تسعى له دول واديار= وتركض للوصول رجال تلهث له ورى كوره
تفرقنا وطار الطير \ صار الحاصل اللي صار=وضيعنا الجهات وصارت الحيلات مبتوره
على حد الطريق اللي تواراله قبس من نار= لياحد البصيره والعمى والعين مذروره
تتيه دروب لو( زرقا اليمامه) تنتخبها ابصار =وش اللي ينفع الناظر بلا تحديد منظوره
(أتنشن) سيداتي سادتي في نشرة الأخبار = أفاد المصدر المسئول وثيقه غير منشوره
يقولون العرب صار اتفاق(ن)صارم(ن) بتار = على لا(اتفاق) ودونت بامثال مشهوره
تواكب جملة (اللآ آت) شعار بمحفل الثوار= وتُعْسَفْ (شجب واستنكار) مع الشجاب والثوره
بعد هدّن بي شويه \ شويه والحياه اعمار = وبسم اللي خلق كونه وعلّم عِدّةْ شهوره
تَنَحّنْ عني بوجه الكريم الواحد الستار= أسبح كل لحظاتي بحمده وارتجي نوره
وعزة ربي الواحد وذكره ماني المحتار = ومن فضل الحكيم استغفره والنفس مسروره


ألا يالأمه اللي ضَيّعَتْ من قسمت لاْمْصَار=ترى لاعَوْدْ للأمجاد دون العود للسوره
بعد ذكراعتصام بحبل رب(ن) واحد (ن) جبار= عن التفريق خوذوا شوط والآيات مذكوره
ومن خيبة ملوك للطوايف خوذوا التعبار = تمادوا في بطرهم والرجل يمدح به غروره
تمادوا ناعم الملبس ولا داروا حقوق الجار = حتى ضيعوا مجدٍ تليد وهيبة حْضوره
بكت غرناطه من الظيم غب الحاكم السمسار= تُوَشّحْ من بلاد الأندلس نغمات مسحوره
عتاده (غانيات القوم) والعده (نغم مزمار)= وش اللي ترتجي (أشبيليا) والخيل مقهوره
وش اللي ينفع قصورٍ بنوها سالف العمار = وكانت مع ترفها دوم بالتسبيح معموره
مادام اللي ورثها كل زواره من السمار =قرا السطر التعيس اللي هوى به لاسفل قعوره
قرا آيه ترك آيات وجلاسه هل الأسفار = حفظ توراتهم وانجيلهم والنفس مسطوره
ترى من هاب يرقى هام( راس المعتلي) واحتار= مكانه بالطمان الدايم الغاير مع حفوره
عليه قصور هالحمرا بكل النقش والأحجار=تفور بغيض من خوف البغيض ونار تنوره
زمان الأندلس ولى وياخوفي من التكرار= مواري (درب تاريخ) وعليلاته ومجدوره
متاكم ياعرب تمشون سكه كلها دوار= مدام الدايره مالانهايه غير محصوره
عسى تقتل بلاهة حال وتحيا فيكم الأفكار =وبالتدريج تتدرب على الرايات منصوره
ترك فيكم (رسول الله) إثنينٍ واضحات أخيار = كتاب الله مع السنه كلام الخالق ونوره
بعد عضوا عليهن بالنواجذ سيلهن مدرار = سكيب الغيث يبدا في بعض قطرات مبروره
قويه حزمة التجميع ليا حاول بها المنشار = واذا فَرّقْت هالحزمه بلا منشار منشوره
تجي نستعرض التاريخ رحله ماتبي مسبار = ونبحث ماتواترناه بْاكْتابات مسبوره
سبب هذا الخنوع (الجبن)لا(زيتون)لا(اْستعمار)=سلامك للسلام وحلم شجعانه ومنظوره[/poem]