رد: بيت شعر تهديه للي بعدك --
في نفس من يهواك مربع ومرتاع
يا مشغل التّفكير صورة خياله
جرحتني في القلب في ساعة اوداع
جرحي نزيف ولا لقينا دوا له
أحس كنّه ينزع الرّوح نزّاع
والموت في عيوني تهايا ظلاله
والا كما همٍّ تكسّر في لاضلاع
نفسي حداها من هواها زواله
آمنت في أمره وأعطيته الطّاع
وهوه يعذّبني على كل حاله
راعي جبينٍ في دجى اللّيل لمّاع
وخدٍّ كما البرّاق ياضي اشتعاله
العين عين اللّي حذورٍ ومرتاع
والعنق عنق اللّي يذيره خياله
تورد على يمٍّ غزيرٍ ونبّاع
غرٍّ من الآرام صعبٍ مناله
ما بين قلبي والفكر دايم اصراع
كنّه على روحي اتهّافت اهواله
ياما رفعت الصّوت لكن ما شاع
صوتٍ يردّد بالصّدى في جباله
شروات ذيبٍ جر بعواه لى جاع
فاته عشاه وحاين البين حاله
ويهيّج اشجاني إلى هب ذعذاع
ليت النّسيم ايّيب منهم رساله
عساه ظنّي في هل العرف ما ضاع
كنّي على زيزا ضحا ضيح لاله
أمشي وساميّ الطّويلات ميقاع
روس الشروف وعاليٍ من تلاله
لا في الهوى رحمه ولا منك مفزاع
يا مشغل التّفكير صورة خياله
__________________
|