يارب تكفي لساني شر بعض الكلام

يارب تكفي لساني شر بعض الكلام
اللي يجرح عباد الله بذكر العيوب

الهرج يجرح وجرحه مثل جرح الحسام
والعبد ماهو على بعض الكلام مغصوب

من جنب الناس هرج الشين عاش بسلام
ويصيرمن بين كل الناس شخص امحبوب

اعمارنا تنطوي طي السجل كل عام
وسهم المنايا يحوف العمر من كل صوب

الوقت ما يحسب حسابه جميع الانام
والوقت كله من عمار العباد امحسوب

والنفس تسرج هقويها حلوم وهيام
والحلم فوق البحر يبني مسار ودروب

واخر نهايات حلم النفس فك اللثام
وتبعثر اوراقها قدام وجه الهبوب

العمر يشرق شروق الشمس لين التمام
حتى يودع وداع الشمس وقت الغروب

ويالله طلبناك قبل الموت حسن الختام
ومن قبل شدالرحايل لجل وجهك نتوب

مساعد المزعل