البارحه يوم شفت النور وسط الظلام

البارحه يوم شفت النور وسط الظلام
عادت علي الليالي حسب عاداتها

ماكنها الا على الاعصاب برد وسلام
من بعد ماجمرت نيران شباتها

حطيت سيفي بغمده ماعليه ملام
وقفت شامخ ألردتها وغارتها

لاتسرج الشوق طار الشوق وسط الغمام
تسابقت بالغلا هتان دمعاتها

يبرق جبينه ويرعد في حزين الكلام
والارض تبكي حزينه من خيالاتها

لو يشكي العام كاد العام عن كل عام
تبكي لياليه بيامه وساعاتها

ماهي دموع الغرام اللي دهاه الغرام
ولا هي دموع الحياه ولا ملاذاتها

نرمي سهوم الحقيقه لو تصيب السهام
مات الخبر في حقايقها وفي ذاتها

يارعي النوم عطنا من عيونك منام
حسب المبادي وطيبتها وميقاتها

من كون الكون كون للخلايق نظام
والله علم في خوافيها ونياتها

صحايف الخلق تنشر يوم وقت الزحام
وتشوف حسناتها وتشوف سياتها

وتشوف تاج الكرامه في وجوه الكرام
من طيبت اعمالها لله ومداتها

وتشوف سود النوايا حاسدين الانام
الحسد اكل كل طاعتها وحسناتها

وش ينفع اللي بلا طاعه كبير المقام
تعزل فعول الخلايق عن مقاماتها

والخلق يفنى ولله العظيم الدوام
ينفس جوزي عن الدنياء وغفلاتها

يانفس كفي عن ذنوبك بكثر الصيام
وطيب النفوس وزكاوتها صلاواتها

طبع النفوس الرضيه ماتمل القيام
ان ثبت الله تقاها في خلاوتها

ويالله طلبتك جزيل المد حسن الختام
في ساعة(ن) ماحسبنا في حساباتها

مساعد المزعل