مطلبك ماتلقاه عند عنزية

السلام عليكم ورحمة الله
مصافحة أولى أرجو أن تصل لمستوى ذائقتكم
وتجد القبول والترحيب

ياكثر ماقلت لك ماني مثل غيري
. . . . . . أتبع دروب الخطا من غير أي تفكير
حاجة وغير البشر ياصعب تفسيري
. . . . . . . . ماهو غرورٍ أبد أحلام دايم غير

ياللي تدور للردى وماتبي تجوز
. . . . . . . . . مطلبك ماتلقاه عند عنزيـّة
بنت الرجال اللي لها العز مركوز
. . . . . . . . . من خلقة الأكوان لين المنيـّة
فوق الخلايق راسها دوم مغزوز
. . . . . . . . عالي وشايم عن دروب الرديـّة
أقسى من الصبار وأحلى من اللوز
. . . . . . . . . وآرق من نسمة وغيمة نديـّة
ماباعت الأخلاق في ساحة العوز
. . . . . . . . . أو رافقت خوّان نفسه دنيـّة
ولاشالت البرقع ولا لبست جنوز
. . . . . . . . .أو ساقت الموتر أمام البريـّة
قد قالها مبطي وقبلي أبو روز
. . . . . . . .وأحفظ كلامه زي حفظ الوصيـّة
( آنا عنزي والغدر مايقرب عنوز )
. . . . . . . .. أهل المكارم والصفات النقيـّة
من سار درب العزّ لابدّه يفوز
. . . . . . . ودرب الردى ملعون روحة وجيـّة
وأنْ صار يوم وكنْت في حضرة عنوز
. . . . . . . . .. أضبط وقوفك ثمّ دقّ التحيـّة

:
:

أحــ مؤجلة ـلام