[frame="5 80"]نعطي خــريطتنـا ونعطي احداثي .. وتاريخنـــا موجـود والنـــاس تقرا
يوم الزمان الشين والفقر جاثي .. صوت بها أبن مهيد وبالمجد عذرى
..................
1-لو ما لنا بالمجد قدوات وشيوخ ... يمدي مع العربان صرنا همايل
2-قـــاد الجهـامه للعـلا كل مطنـوخ ... وبالسيــف ياما عـدلوا كل مايل
......................
1-يوم المكـارم ثمنها غاليــات العمار ... مع كل فج سلكنا؟ دروبها ولا نتيه
2-من يوم عهدالصحابه حنا فيها كبار ... مواقف خالــدات وعز فيها الشبيه
.......................
1-درب المعـالي نسلكه طنخه وذوق .. وتفنى جميع الناس والذكر باقي
2-عشق البشر لازاد ياتي به حروق .. والحـــب لله يجعــل الفكـــر راقي
.............
1-ياسقى الله ما مضــالي بالحياة ... عشــــت فيهــا لااكتئــاب ولاملل
2-كل همي روض معشب للشياه ... وحفـظ نفسي عن متاهات الزلل
3-ويـوم دار الوقت ضاع الاتجاه ... مدري فينـا مدري بالوقـت العلل
4-شفـت بعض الجيل قلانن حياه ... وشفــت نــاس راكبه درب الخلل
...................ز.
1-ليـت الحنـايـا ماتقفـل على الغش .. وحسبي عليها يوم تبلى السراير
2-يا راعي الوجهيـن يا مكثرالحش .. ياللي عليـك مـن المخازي دواير
3-حقـك على الاكـرام تقـول لك آش .. يومـك بديـت الهـرج بليــا ضماير
.......................
1-يـاهـاجسي ارجـوك خلك قيادي ... وابذل افعال الطيب وأرفع بها الراسْ
2-لا تـامـن اللي ينكـرون المبادي ... ناسـك معــادن واحـذر العـرق دساسْ
3-امْشي على الجره ولاني بغادي ... اتْلي أسْــلاف طبْعهـــــم خيــرة الناسْ
4-بواجـة الديـره اسْيــاد البــوادي ... اللي لهــم تاريــــخ.؟ وعـــز ونوماسْ
.............
1-الله علــى اللـــي في ذراهـم لنـا في .. والله على وقـت ذهـابه حسوفه
2-ان جتك ميله والزمن صاربك سي .. لا تزبـن اللي راديـاتن وصوفه
3-عليـــك باللي بالصخـا حـــاتم الطي .. وان جـات فزعه عنتريه سيوفه
4-واليــا بدى لازمـــك يصيــر لك خي .. ما غـاب عنك ولو تحده ضروفه
................
1-الرزق لي مكتـوب والعمـر محدود ... وآمنت بالله والقــدر حـق الإيمان
2-الناس (تفنى) والجســد قوت للدود ... بــس الكـــرامة ما تقدر بالأثمان
..................
كلي آمل ان هذه المقتطفات تحوز على رضاكم ايها الاخوه الكرام.
ان اعجبتكم اطلبوا المزيد وانا حاضر باذن الله : والسلام عليكم ورحمة الله وبركاته
[/frame]