اهـ ياساعة الفرقى وصالي لظاها
واهـ يازفرة الصدر الشقي المعنىّ
واهـ يادمعتن فاحت بصادق غلاها
ترجمة غيض قلبن بعدها ماتهنىّ
روّحت لاخطا مني ولاهو خطاها
مير مكتوب وظروف الزمن داهمنّا
كسرتني بنظرتها وهزّت يداها
وغصّت عيوني العبرات غصب وبكنّا
ولجّت الارض بالفرقى وجاير صداها
وطاول الحزن قلبي والعيون ارمدنّا
ودّعتنا السعاده واعناي وعناها
وحاصرتنا جيوش الشوق منا ومنّا
ياوجودي بعدها كيف ابنسى هواها
لوّعتنا الليالي والظروف اضرسنّا
والله إني لاموت وخاطري مانساها
شربت عروش قلبي حبها واهجرنّا
ياوجودي وجود اللي تزايد رغاها
مات عنها ولدها والبدو ماتونّا
تمشي شوي وتوقّف وتنظر وراها
ثم صنّت تسمّع له وقامت تحنّا
وفركت زورها في الارض هذا جداها
فطّرت كبدها وضلوعها يرجفنّا
اتناسى وانا ما انسى وازيد بضماها
واشرب بذكرها سم الهوى واتهنّا