صوت المطر والبرق شق السحابه
ومن فرحتي كني مع الغيم ابا اطير
كيف المطر شكل بصدري رحابه
حتى جعل في طلته فرحتي غير
رجع عليه مامضا لي وجابه
مقناص في روضا كسته النواوير
اقفى وروح مع زمانا غدابه
روس الرجال اللي تسوق المباهير
اللي زهاب الهيل تحسب حسابه
وسمعة مجالسها تجيب المسايير
واللي لباس الصدق تلبس ثيابه
دون الرفاقه ماتسوق المعاذير
ماهي مشذبة القفى والقرابه
اللي جمايلها مثل دمعة الطير
وتغير الاجيال مابه غرابه
ذي سنة المولى حسين التدابير
ومايمنع المشتاق مثل الاصابه
شفني شحذت الحيل وازريت لاسير
ويارب تجعل دعوتي مستجابه
يالواحد المعبود وال المقادير
انت الحليم اللي ربطنا الرجابه
ويارب تجعل كل ماصابنا خير
مساعد المزعل