اللي على الهامش تعيش المهابيل

ا،،،،،،،،،،، ،،،،،،،،،، ،،،،،،،،،،،،،،،
اخترت لي موال بين المواويل
عليه سيرت القلم للكتابه

اشره على بعض الحكي والتماثيل
مابينها وبين والحقيقه تشابه

اللي تغير واقع الجيل للجيل
كن الاوادم عايشه وسط غابه

من عادة الدنياء بها العدل والميل
وبالاخره كلا يواجه حسابه

وين الغريب ان جاك واد الفتن سيل
ومن يعترض واديه طاح وغدابه

واللي على بعض الحكا تسرج الخيل
مثل اللذي عشم ضماه بسرابه

ياقومنا جوزوا عن القال والقيل
هرج القفاء عار(ن)على من حكابه

هرج الرجل محسوب بين الرجاجيل
يرفع جنابه ماينزل جنابه

وبعض السوالف للمغفل محابيل
قطرة عسل ترمى لوجه الذبابه

اللي على الهامش تعيش المهابيل
عنهم تغسل مثل غسل الجنابه

وروس الرجال اللي كرمها هماليل
ربي رفعهم مثل غيم السحابه

اللي مجالسهم مثل ريحة الهيل
يرخص له العمسان غالي زهابه

اهل الشيم واهل القيم والمعاميل
لامرها الطرقي ينوخ ركابه

مع طيبة الخطر وعذب التعاليل
جازت له علوم الرجال وسلابه

واللابه اللي ماتعرف الحلاحيل
هذي زلابه ماتسمى بلابه

ولو صارت الانذال مثل القناديل
معروفها حيله وغدر ونهابه

والعمر يفنى والليالي مقابيل
حكم الله الواحد وسنة كتابه

ويالله عسانا يوم حصد المحاصيل
نحصد مثل حصد النبي والصحابه

مساعدالمزعل